Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Katar Döwletiniň Olimpiýa Komitetiniň prezidenti bilen duşuşdy

2025-nji ýylyň 2-nji aprelinde türkmen halkynyň Milli Lideri, Türkmenistanyň Halk Maslahatynyň Başlygy, Gahryman Arkadagymyz Gurbanguly Berdimuhamedow Katar Döwletiniň Olimpiýa Komitetiniň prezidenti Şeýh Joaan bin Hamad Al Tani bilen duşuşdy.

Türkmenistanyň Halk Maslahatynyň Başlygy hem-de Şeýh Joaan bin Hamad Al Tani mähirli salamlaşyp, birek-biregi mübärek Oraza baýramy bilen gutladylar we iň gowy arzuwlaryny beýan etdiler.

Myhman duşuşmaga döredilen mümkinçilik üçin hoşallyk bildirip, Katar Döwletiniň Emiri Şeýh Tamim bin Hamad Al Taniniň salamyny we rowaçlyk, abadançylyk baradaky arzuwlaryny ýetirdi.

Gahryman Arkadagymyz Katar Döwletiniň Emiri Şeýh Tamim bin Hamad Al Tanä iň gowy arzuwlaryny beýan edip, onuň bilen ýakynda geçirilen telefon arkaly söhbetdeşligini ýakymly duýgular bilen ýatlaýandygyny aýtdy.

Şeýle hem türkmen halkynyň Milli Lideri Şeýh Joaan bin Hamad Al Taniniň ýurdumyza şu saparynyň Türkmenistan bilen Katar Döwletiniň Olimpiýa Komitetiniň arasynda sport ulgamynda alnyp barylýan hyzmatdaşlygy işjeňleşdirmäge täze itergi berjekdigine ynam bildirdi.

Duşuşygyň dowamynda bellenilişi ýaly, Türkmenistan halkara sport hyzmatdaşlygyna, şeýle hem Olimpiýa hereketine işjeň gatnaşyp, dünýä derejesindäki ýaryşlary üstünlikli geçirmekde baý tejribä eýedir. 2017-nji ýylda Aşgabatda üstünlikli geçirilen Ýapyk binalarda we söweş sungaty boýunça V Aziýa oýunlary munuň aýdyň mysalydyr.

Türkmenistanyň Halk Maslahatynyň Başlygy Türkmenistanyň bu möhüm ulgamda ugurdaş halkara guramalar bilen hyzmatdaşlyga aýratyn ähmiýet berýändigini belledi. Döwrebap sport infrastrukturasyny döretmek, türgenler üçin amatly şertleri üpjün etmek, halkara ýaryşlary geçirmek Türkmenistanyň sport syýasatynyň ileri tutulýan ugurlarydyr.

Milli Liderimiz şu günki duşuşygyň sport hyzmatdaşlygyny täze derejä çykarmakda we Olimpiýa hereketiniň ösüşine goşant goşmakda möhüm ädim boljakdygyny belläp, Katar Döwletiniň Olimpiýa Komitetiniň prezidentiniň ýurdumyza şu saparynyň sport ulgamyndaky özara gatnaşyklary işjeňleşdirmäge, täze başlangyçlary öňe sürmäge itergi berjekdigine ynam bildirdi.

Duşuşygyň dowamynda Gahryman Arkadagymyz Kataryň sporty ösdürmekde gazanýan üstünliklerine ýokary baha berip, ýurdumyzyň bu ulgamda hyzmatdaşlygy giňeltmäge taýýardygyny tassyklady hem-de mümkinçilikden peýdalanyp, katar tarapyny Türkmenistanyň hemişelik Bitaraplygynyň şanly 30 ýyllygy mynasybetli 12-nji dekabrda Aşgabatda geçiriljek halkara foruma gatnaşmaga çagyrdy.

Türkmenistanyň Halk Maslahatynyň Başlygy Türkmenistan bilen Katar Döwletiniň Olimpiýa Komitetiniň arasyndaky hyzmatdaşlygy has-da ösdürmäge goşýan uly şahsy goşandy we bu ugurda ýurdumyzyň başlangyçlaryna berýän goldawy üçin Şeýh Joaan bin Hamad Al Tanä minnetdarlyk bildirdi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy, Gahryman Arkadagymyz Gurbanguly Berdimuhamedow we Katar Döwletiniň Olimpiýa Komitetiniň prezidenti Şeýh Joaan bin Hamad Al Tani birek-birege iň gowy arzuwlaryny beýan etdiler.